Редакция

Ләйлә Рәшит кызы Сабирова

Мөхәррир IMG_9917

Ләйлә Рәшитовна татар журналистикасы тормышына студент чагыннан битараф түгел. Шушы белгечлекне тәмамлагач, аспирантура үрләрен яулады. Кандидатлык диссертациясен яклагач, булачак хәбәрчеләрне тәрбияләүгә үз өлешен кертә башлады. Шул ук ул вакытта ул республикабызның саллы, популяр гаммәви матбугат чараларында үзенең кыю фикерләре белән чыгыш ясаган журналист буларак та танылды. Бүгенге көндә Ләйлә Рәшит кызы, фән белән генә чикләнмичә, университетыбызның «Darelfөnүn» газетасын җитәкли.

Гөлфия Зилиф кызы Камалиева

Биткә салу һәм дизайн буенча белгеч

Нинди дә булса продуктны җитештерү генә җитми, аны тәкъдим итә белергә дә кирәк. Редакциябездә бу җитди эш Гөлфия Камалиева тарафыннан башкарыла. Язганнарны газета рәвешенә китерү өчен бик күп техник программаларны белергә, һәр фотосурәт, иллюстрациягә дизайнер күзлегеннән карарга кирәк. Ә Гөлфия Зилиф кызы – үз эшенең остасы. Филология фәннәре кандидаты. Сер итеп кенә әйтәбез: ул КДПИның татар филологиясе һәм тарих бүлеген тәмамлаган. Татар теленә мәхәббәте һәм үз эшенә бирелгәнлеге менә кайдан икән аның!

Роза Әмин кызы Асылгәрәева

Корректор роза копия

«Darelfөnүn» редакциясенең иң хөрмәтле, белемле, тәҗрибәле вәкиле – Роза ханым. Аның белән фикерләшмичә, газетадагы материалларга бер артык өтер дә куймыйбыз. Татар теленең орфографик кагыйдәләрен, стилистик үзенчәлекләрен аның кебек яхшы белүчеләр бик сирәк. Фәнни һәм педагогик тәҗрибәсенең күп өлешен ул татар теленә, аны укыту методикасына багышлаган. Хәзер лаеклы ялда булуына карамастан, Роза Әминовна үз халкына, университетына хезмәт итүдән туктамый.

Айгөл Айрат кызы Абдрахманова

Хәбәрче
RqjHHadAJCc
КФУның Л.Н.Толстой исемендәге Филология һәм мәдәниятара багланышлар институтын 2015 елда кызыл дипломга тәмамлый Айгөл. Белгечлеге – татар теле һәм әдәбияты. Университетта уку дәверендә ул милләтпәрвәр, тырыш, күпкырлы, креатив шәхес буларак җитлегә. Әдәби иҗат белән «җенләнгән» күңеле аңа гел дә тынгы бирми. Ул һәрвакыт яңалыкка омтыла. Университетта һәм гомумән җәмгыятебездә татар телен популярлаштыру максаты белән яна ул. «Darelfөnүn» битләрендә татар яшьләренең тормышын яктырту белән беррәттән, Айгөл газетабызны сайт һәм социаль челтәрләр аша таныту өчен дә җаваплы.

Руфинә Ришат кызы Дунаева

Хәбәрче
Дунаева Р.Р
Татар җанлы хезмәткәребез Руфинә дә «Darelfөnүn» газетасы тормышына 2015 нче елда гына килеп керде. Яшьләргә хас кыю карашлары аны алдынгы фикерле, үткен сүзле хәбәрче итеп танытты. Уртак эшебез газетаның басма санын әзерләү булса да, һәр кеше үз күңеленә якын тагын өстәмә эшләр белән шөгыльләнә. Руфинә чит илләрдә яшәүче милләттәшләребез белән элемтәгә керү, хезмәттәшлек урнаштыру, аларга университетыбыз турында мәгълүмат җиткерү, татар яшьләренең тормышын яктырту, туган телне саклау һәм үстерү белән мәшгуль.

Раил Равил улы Садретдинов

Хәбәрче
Раил Садретдиновның «Darelfөnүn» белән дуслыгы студент елларыннан башлана. Каләмле журналистны редакция хезмәткәрләре күреп ала һәм Уиверсиада авылында үзхәбәрче итеп билгелиләр. Раил газета битләрендә студентларның укудан соңгы тормышларын, кызыксынуларын, Универсиада авылында булган чараларны актив яктыртырга тиеш була. Бүген Раил Садретдинов — үзе шушы редакция хезмәткәре. Эшләү дәверендә ул үзен җаваплы хезмәткәр, сүз тәмен белүче иҗатчы итеп танытты. Ул даими авторлар белән эшли, газета битләрендә КФУның иҗади, актив яшьләре, яшь галимнәр белән таныштырып бара.