Казан федераль университеты Н.И.Лобачевский исемендәге Фәнни китапханәнең кулъязмалар һәм сирәк китаплар бүлегендә Лев Толстойның Казандагы тормышына һәм укуына багышланган документаль фильм төшерелде. Фильмның премьерасы бу елның декабрендә «Ясная Поляна» музей-утарында, бөек рус язучысының туган ягында узачак.

КФУда төшерелгән фильм фрагментлары Л.Н.Толстойга университетка укырга керергә ярдәм иткән китапларга багышланган. Фильмның сюжеты шулай ук булачак язучының юридик факультетта уку темасына да кагыла.

«Кызганыч, язучының Казанда булу вакыты турында бик аз кеше белә икән, ә монда ул алты ел диярлек булган. Безнең максат — әлеге чорны күрсәтү, аның белән бу вакытта ниләр булганлыгы турында сөйләү. Казан университетыннан башка Лев Толстой турында фильм төшерергә ярамый «, — диде режиссер һәм фильм авторы Вячеслав Иванчук.

Фильмда Казан университетының башка локацияләре дә катнаша, атап әйткәндә: КФУның төп бинасында Юридик факультетта уку аудиториясе,  Л.Толстой беренче тапкыр «тере картиналарны» күрсәткән Актлар залы (хәзер — Император залы) һәм Н.И.Лобачевский исемендәге Музей.

Лев Толстой тормышының Казан чоры — шәхес формалашу, бөек язучының дөньяга карашын формалаштыру чоры. Белгечләр сүзләренчә, ул үзенең атаклы көндәлеген Казан Император университеты студенты буларак алып бара.

«Казан университеты диварларында үткәргән вакыт йогынтысыннан башка  язучы Л.Толстойны белмәгән булыр идек, яки ул башка мәнфәгатьләргә ия булыр иде. Д.И.Мейер буенча Екатерина IIнең «Наказ»ы  белән Монтескьеның «Кануннар рухы»н чагыштыру да җитә. Монтескье аның белән чын-чынлап мавыгып китә, хәтта ки язучы әйтүенчә, укырга һәм уйларга мәҗбүр итә, — дип саный Кулъязмалар һәм сирәк китаплар бүлеге мөдире Эльмира Әмирханова.

Казанда фильм «Мир» кинотеатрында күрсәтеләчәк.

Автор: Аделина Биккинина, автор фотосы