Табиб һөнәре катлаулы да, куркыныч та, ә пандемия чорында аңа ихтыяҗ тагын да арты. COVID-19 чорында яңа бурычлар һәм чакырулар, тәүлегенә 24 сәгать эшли белү, йөзләгән коткарылган тормыш, рәхмәтле пациентлар, нульдән булдырылган табиблар командасы  — болар барысы да Казан федераль университетының Университет клиникасының ревматология бүлеге мөдире (хәзерге вакытта вакытлы инфекция госпитале мөдире) Тимур Сибгатуллин турында.

Тимур Сибгатуллинның балачактагы хыялы — табиб булу. Ул Яр Чаллы шәһәрендә туган. Әти-әниләре аңа зур игътибар күрсәткәннәр, җаваплылык хисе тәрбияләгәннәр.

Хәтта балалар бакчасында да мин табиб булып уйный,  барысын да дәвалый идем, өйдә медицина уенчыклары бар иде: стетоскоплар, табиб чүкечләре. Конкурслар өчен рәсемнәр шулай ук медицина белән бәйле: хастаханәләр, ашыгыч ярдәм машиналары ясаганмын. Асылда, минем әти-әнием табиблар булмаса да, мин башка язмышны күрмәдем дә «, — дип искә ала үзенең балачагын Т.Сибгатуллин.

2001 елда, Казан шәһәренең 116 нчы лицеен көмеш медаль белән тәмамлап, КДМУның дәвалау факультетына укырга керә. Күп вакытын укуга багышлый, беренче курста кеше анатомиясен өйрәнү өчен анатомик театрда еш була, университетны кызыл дипломга тәмамлый.

«Өлкән курсларда, госпиталь терапиясе вакытында, без озак еллар КДМУның госпиталь терапиясе кафедрасын җитәкләгән укытучым Илдар Газимҗан улы Салихов кафедрасына эләктек. Ул илебезнең алдынгы ревматологларының берсе иде. Шул вакытта мин ревматологиянең үз тормышымны багышларга теләгән белгечлек булуын  аңладым,» — дип дәвам итә табиб.

2007 елда КДМУны тәмамлагач, ул терапия фәнен практикада өйрәнгән интернатурага керә. Ординатурада укыган вакытта ул төп акцентны ревматологияне өйрәнүгә ясый. Шунысын да билгеләп үтәргә кирәк, ревматология — медицинаның сирәк очрый торган, әмма әһәмиятле авырулар өйрәнелә торган специфик юнәлеше. Алар еш кына буыннарны, эчке органнарга зарар итә.

«Мин ревматологиянең ел саен авыруларны диагностикалауда һәм дәвалауда яңа методлар кертелә торган перспективалы юнәлеш икәнен күрдем. Иң мөһиме — әлеге методларның нәтиҗәсе барлык өметләрне дә аклады. Мин каты авырып килгән яшь пациентларны күрдем, дәвалау курсыннан соң алар ремиссиягә китеп, актив тормыш алып баруларын дәвам иттерәләр», — ди табиб.

2010 елда Т.Сибгатуллин ГИДУВ клиникасында (элеккеге 3 нче РКБ, хәзер — КДМА поликлиникасы) ревматология буенча мөстәкыйль табиб практикасын башлый. 2013 елдан РКБ-2 терапия бүлеге мөдире булды (хәзер — КФУ клиникасы). 2016 елдан — униклиниканың ревматология бүлеге мөдире.

«Рематологияне башка белгечлекләрдән аерып торучы аерым кыенлыклар юк. Үз спецификасы, кайчакта дәвалау кыен булган авырулары белән булган пациентлар гына бар. Кызгылт волчанка (бу авыру, иммунитет организмга һөҗүм иткәндә, бөерләр, үпкәләр, үзәк нерв системасы зарарлана) белән авырган яшь кешенең халәте начарланганда, йөрәккә начар була. Бәхеткә, бүген бу процессны контрольдә тотарга ярдәм итүче препаратлар бар инде. 1950-нче елларда әлеге авыру белән пациентларның 95 проценты авыруның беренче 5 елында һәлак булган», — ди ул.

Пандемия халыкка планлы ярдәм күрсәтүче ревматология бүлеге эшенә дә йогынты ясады. Яңа шартларга бәйле рәвештә мартта планлы госпитализацияне чикләделәр, әмма эш туктамады. Параллель рәвештә яңа коронавирус инфекциясе патогенезын өйрәнүне дәвам иттердек.

«COVID-19 өзлегүләре ревматологик авырулар белән охшаш, чөнки ревматологик авырулар — шулай ук буыннар, үпкәләр, бөерләр зарарлануына иммун системасының хроник реакциясе. Әмма COVID-19 вакытында бу күпкә агрессиврак һәм тиз була. Шуңа күрә ревматологларның COVID-19ны дәвалауда тәҗрибәсе бик ярады,» — ди мөдир.

2020 елның октябрь ахырында униклиниканың терапия һәм ревматология бүлеге вакытлыча йогышлы госпиталь итеп (ВИГ) үзгәртелде, анда өч ай дәвамында Т.Сибгатуллин мөдир булып эшли.

«Вакытлыча йогышлы авырулар хастаханәсендә эш бик интенсив. Баштарак авыр булды, чөнки моңа күнегергә кирәк иде. Ревматологлар, инфекционистлар, хирурглар, урологлар, эндокринологлар, неврологлар, ультратавыш һәм нурланыш диагностикасы табиблары арасыннан яңа команда формалашкан. Минемчә, киләчәк — төрле белгечлек табиблары ниндидер бер мәсьәләне хәл иткәндә үзара тәэсир итешү нәтиҗәсендә барлыкка килгән дисциплинара медицинада. Иң мөһиме — без эшебезнең нәтиҗәсен күрәбез. Башта авыр хәлдә килгән пациент терелү — бу безнең хезмәт өчен зур бүләк. Минемчә, минем фәнгә һәм эшкә кертелгән тырышлыгым бушка түгел «, — дип билгели әңгәмәдәш.

ВИГ мөдире вазифасына дәвалануның алдагы тактикасы, диагностикасы буенча карарлар кабул ителә торган көндәлек обходлар үткәрү керә. Мөдир җилкәсендә язмышны хәл итә алырлык карар кабул итү өчен зур җаваплылык ята, чөнки вакытында һәм дөрес кабул ителгән карар пациентка терелергә ярдәм итә.

«ВИГ мөдире булуым билгеле булгач, авыруның яңалыгы аркасында билгеле бер борчылу булды, һәм бу белемнәрне шактый кыска вакыт эчендә үзләштерергә кирәк иде, әмма без кыенлыклардан курыкмыйбыз. Өченче айда эш күпкә җиңеләйде. Табиблар, шәфкать туташлары, урта медперсонал — без барыбыз да бер команда. Барысы да үз эшләрен белеп башкара, һәркайсының эше мөһим. Бүгенгә болар барысы да автоматизмга җиткерелде, барысы да үз эшләрен белә һәм вакытында җавап бирә», — ди ул.

Киләчәктә, беренче чиратта, Т.Сибгатуллин үз белемнәрен һәм тәҗрибәсен ревматология юнәлешендә пациентларны дәвалауда кулланырга тели.

«Рематологиянең киләчәге зур, шуңа күрә башка өлкәләрдәге белгечләр белән дә хезмәттәшлек итәргә, практик өлкәдә генә түгел, фәнни өлкәдә дә файдалы булырга һәм авыруларны, шул исәптән ревматология авыруларын диагностикалауның һәм дәвалауның яңа ысулларын эшләү өчен КФУның фәнни-тикшеренү командасының бер өлеше булырга телим. Теләсә кайсы процесста иң мөһиме — команда, шуңа күрә янәшәдә һәрвакыт фикердәшләр булу мөһим.

Без, униклиника структурасында эшләгәндә, КФУ җитәкчелеге ягыннан да зур игътибар тоябыз, клиника дәвалау өчен генә түгел, фәнни процесс өчен дә мөһим. Без үзебезне университет белән бер гаилә итеп хис итәбез һәм бу процесска интеграцияләндек, Фундаменталь медицина һәм биология, университетның чиктәш бүлекчәләре белән эшлибез «, — диде ул.

COVID-19 белән бәйле вәзгыять күпләрнең табиб булырга карар кылуына йогынты ясады. Соңгы елда һөнәрнең престижы сизелерлек артты.

«Минем өчен идеаль табибның унификацияләнгән формуласы юк, чөнки һәр табиб — шәхес. Беренче чиратта теләк һәм максатчанлык, кешеләргә ярдәм итәргә кирәк. Яхшы табиблар — барысын да чын йөрәктән эшли торган табиблар. Табиб булырга миңа нәкъ менә шушы установка ярдәм итте. Барлык хезмәттәшләремә пациентны туган һәм якын кеше сыйфатында кабул итәргә киңәш итәм. Барысын да намус белән эшләргә кирәк, — ди ул.

Тимур Булатович —  Сибгатуллиннар гаиләсендә сәламәтлек саклау системасында эшләүче беренче кеше. Аның әти-әнисе — инженер-төзүчеләр, абыйсы — юрист. Шуңа күрә аның гаиләсендә туганнары алдында зур җаваплылык ята: ул еш кына гаилә врачы булып чыгыш ясый, якыннарын консультацияли.

Мондый җаваплы вазифада эшләгәндә, һичшиксез, аңа гаиләсе ягыннан кайгырту һәм аларның аңлавын тоеп яшәү рәхәт.

«Хәтта өйдә булганда да эшләргә, консультацияләргә яки безнең госпиталь табибларына һәм пациентларга ярдәм күрсәтү өчен көннең һәм төннең теләсә кайсы вакытында чыгып китәргә туры килә. Әлбәттә, мондый вәзгыятьтә гаиләнең терәк булуы бик мөһим. Һәр бала һәм хатын да планнарның көтмәгәндә үзгәрүен аңламаячак. Мин үз гаиләмә рәхмәтле. Минем хатыным безнең эшкә, барлык мәсьәләләргә аңлап карый, минем камилләшүемне хуплый, әхлакый яктан ярдәм итә. Ике ул үстерәбез. Медицина династиясенә нигез салучы булырга дигән хыялым бар, һәм бер улымның минем эздән китүен телим», — ди табиб.

Сүз дә юк, Тимур Булатович  үз һөнәренә булган батырлыгы, хезмәт сөючәнлеге, сизгерлеге һәм яратуы аркасында әле тагын йөзләгән пациентны терелтәчәк. Савыгудан соң күпләр аны рәхмәт сүзләре белән искә төшерәчәк.

Автор: Алинә Минневәлиева, фото: Александр Кузнецов