Казан федераль университеты Психология һәм белем бирү институты студентлары һәм мөгаллимнәре Музей атнасы дигән акциядә катнаштылар. Аның кысаларында булган очрашулары хакында алар болай дип яза.
Казан Кремле – Татарстан тарихы һәм мәдәниятенең уникаль һәйкәле, үзендә борынгылыкны һәм заманчалыкны, төрле халыклар мәдәниятләрен, риваятьләрне һәм фактларны берләштерүче Казаныбызның «йөрәге». Мәркәзәбез Казанда Музей атнасы кысаларында без студент шәкертләребез белән, эстетик тәрбия бирү максатын күздә тотып, апрель аеның бер кояшлы һәм нурлы көнендә Казан Кремленә – аның музей-галереяларын, анда тупланган коллекцияләрне карарга юл тоттык.
Кремль диварлары эченә кергәч үк, безне шунда ук сихри дөнья үзенә җәлеп итте: без мәдәни-тарихи әкияткә килеп кердек. Мин студентларыма Кремль буйлап экскурсия күрсәттем. Студентларыбыз белән “Ислам мәдәнияте музее”, күргәзмә залы “Манеж”, “Хәзинә” милли картина галереясы, “Татартан Республикасы һәм татар халкының дәүләт тарихы” музее, “Бөек Ватан сугышы музей-мемориалы”, Санкт-Петербург Эрмитажының филиалы «Эрмитаж-Казан» үзәге экспозицияләре белән таныштык.
“Бөек Ватан сугышы музей-мемориалы”нда без Бөек Ватан сугышы, аның тарихы турында бик күп кызыклы мәгълүмат алдык. Андагы экспонатлар, хатлар, плакатлар, фотолар, төрле корал макетлары, сугыш киемнәре – һәммәсе дә, студентларда олы хисләр, бик зур кызыксыну, хөрмәт уятты. Музейда студентларыбыз алган хис-тойгылар алар күңелләрендә мәңге сакланыр дип уйлыйбыз.
“Ислам мәдәнияте музее”нда студентларга Казан татарларының ислам диненең үзенчәлекләре, спецификасы күрсәтелде. Аларга монда ислам дине белән бәйле цивилизация хакында, ислам дөньясының фәне һәм мәдәнияте турында тәфсилләп сойләнелде, татар халкының ислам мәдәнияте үсешенә керткән өлеше хакында мәгълүмат бирелде. Монда ислам дине традицияләренең татар халкының мәдәниятендә һәм сәнгатендә ничек чагылыш тапканы турында сөйләнелде.
Казан Кремле студентларыбыз күз алдына гаҗәеп истәлекле, бердәм архитектура һәм культура ансамбле булып килеп басты.
Казанда шулай ук Музей атнасы кысаларында Милли музейда Россия һәм Белоруссия арасындагы бердәмлеккә, һәм шулай ук Поэзия кичәсенә багышланган чара булып узды. Әлеге әдәби кичәдә 1 курс студентлары катнашты. Музейда күренекле татар шагыйре, публицист, әдәби тәнкыйтьче, әдәбият һәм сәнгать өлкәсендә РФ дәүләт премиясе (2005), Татарстанның Габдулла Тукай исемендәге Дәүләт бүләге, Муса Җәлил исемендәге, Державин премиясе (2016), Башкортстанның Фатыйх Кәрим исемендәге премияләр лауреаты, Татарстанның атказанган сәнгать хезмәткәре Ренат Харис белән очрашу оештырылган иде.
Оештырылган кичәдә Р. Харис үз шигырләрен укыды, студентлар аңа сорауларын бирделәр. Р. Харисның шигъри әсәрләре заманча үткен яңгырашы, интернациональ рухы, образлы фикерләүдәге яңача алымнары, кыю метафоралары һәм чагыштырулары, форма өлкәсендәге оригиналь табышлары белән җәлеп итә. Шагыйрь үзенең шигырь һәм поэмаларында халкыбызның тарихи яшәеше, кеше шәхесенең тормыштагы урыны, җәмгыять каршындагы җаваплылыгы, буыннар дәвамлылыгы турында уйлана, заманның әхлакый, рухи, иҗтимагый күренешләренә, үзгәрешләренә үзенең фәлсәфи һәм гражданлык мөнәсәбәтен белдерә. Шагыйрь әсәрләренең лирик герое җирнең иминлеге, халыкларның азатлыгы, интернациональ бердәмлеге хакына яши, дөньяның, табигатьнең матурлыгын күреп соклана һәм ул матурлыкның мәңге дәвам итәчәгенә зур өмет баглый.
Шагыйрьләребез, язучыларыбыз, галимнәребез, сәнгать хезмәткәрләре белән бәйле мондый рухтагы әдәби кичәләрне студентларыбыз өчен оештыру бик кирәк һәм файдалы, чөнки андый очрашулар күңелләрдә тирән эз калдыра, студентлар танылган шәхесләрдән үрнәк ала, аларның тормышлары турында кызыклы мәгълумат ала, уңышка һәм танылуга ничек итеп килгәннәрен ишетә. Олы шәхес шәхесне ясый, без моны үз эшебездә онытытырга тиеш түгелбез!