Казан федераль университеты 215 яшьлек юбилеен 25нче октябрьдән – 29нчы ноябрьгә кадәр Татарстаныбызның 18 шәһәрендә бәйрәм итәргә планлаштыра! Әлеге грандиоз акция исә «КФУның фәнни десанты» исеме астында узачак. Бу хакта «Татар-информ» МА матбугат конференциясендә рәсми рәвештә хәбәр ителде.
«Берничә ай элек КФУда 10 нчы тапкыр «PROНаука» проекты булып узды. Хәзер исә без спикерларны Республика регионнарына да чыгарырга һәм эшләнмәләребезне шунда тәкъдим итәргә телибез. Әлбәттә, бу киңәйтелгән форматта булачак, әйткәнебезчә, 25 нче октябрьдән – 29 нчы ноябрьгә кадәр. Искәртеп узарга кирәк, бу акциягә иң кызык, мавыктыргыч һәм масштаблы эшләр генә сайлап алынды», — дип ассызыклады КФУның PR һәм реклама департаменты директоры Мөхтәрова Ләйлә Марат кызы.
«КФУның фәнни десанты» ул — 13 институттан, 1 югары мәктәптән, КФУның 1 факультетыннан һәм 2 филиалыннан фәнни-популяр лекцияләр, иҗади коллективлар чыгышы, кабул итү комиссиясе консультацияләре, мастер-класслар, викториналар, тәҗрибәләр… Мәсәлән, геология Институты «Үз маршрутыңны җый» квестын, математика һәм механика Институты роботны ничек эшләргә кирәклеге турында интерактив квест үткәрәчәк. Шулай ук гуманитар фәннәргә дә урын булачак, дип искәртеп узды КФУ хезмәткәрләре.
Күпләрне шатландырган хәбәр дә яңгырады әлеге пресс-конференциядә: «КФУның фәнни десанты» акциясендә һәм «PROНаука» проектында керү бушлай! Әмма аудиториядә, мастер-классларда һәм интерактивларда утыру урыннарын исәпләү өчен алдан теркәлү узарга кирәк. КФУның PR һәм реклама департаменты директоры урынбасары Никитина Ксения Александр кызы хәбәр иткәнчә, «КФУ фәнни десанты» проектына теркәлү ВКонтакте социаль челтәрендә шул исемдәге чара төркемендә инде ачылган.
Пресс-конференция азагында 30 ноябрьдә югары уку йортының икенче корпусында «КФУның фәнни десанты» акциясен «Төн формуласы» исеме астындагы 11нче «PROНаука» проекты күчмә чаралар сериясен тәмамлаячагын да әйтеп уздылар.
«КФУның фәнни десанты» акциясе узачак шәһәрләр:
Апас – 25.10.2019
Актаныш – 29.10.2019
Лениногорск – 30.10.2019
Мамадыш – 31.10.2019
Әлмәт – 01.11.2019
Менделеевск – 05.11.2019
Чистай – 06.11.2019
Минзәлә – 07.11.2019
Норлат – 08.11.2019
Алабуга – 09.11.2019
Зәй – 12.11. 2019
Әгерҗе – 13.11.2019
Мөслим – 14.11.2019
Бөгелмә – 15.11.2019
Азнакай – 20.11.2019
Сарман – 21.11.2019
Арча – 22.11.2019
Яр Чаллы – 27.11.2019
Илүзә Касыймова. КФУ Журналистика ёщм медиакоммуникацияләр югары мәктәбе студенты.